Emakumearen aurkako Indarkeria Ezabatzeko Nazioarteko Eguna
ELKARTEANetik Desgaitasun Fisikoa duten Pertsonen Euskadiko Elkarte Koordinatzailetik, Emakumearen aurkako Indarkeria Ezabatzeko Nazioarteko Eguna, azaroaren 25a dela eta, ozen hitz egiten dugu emakumeek eta neskatoek jasaten dituzten indarkeria mota guztiak salatzeko. Gaur, indarkeria digitala jartzen dugu hizpide, desgaitasun fisikoa duten emakumeei eta neskatoei berariaz eta modu larriagoan eragiten dien indarkeria matxista.
Desgaitasuna duten Pertsonen Eskubideei buruzko Konbentzioak 6. Art aitortzen du, desgaitasuna duten emakumeek eta neskatoek diskriminazio mota ugari jasaten dituztela. 16. Art indarkeriarik eta abusurik gabe bizitzeko eskubidea bermatzen du, eta 21. Art berriz, adierazpen-askatasunerako eta informazioa eskuratzeko eskubidea, ezinbestekoak baitira ingurune digitalean segurtasunez parte hartzeko.
Hala ere, eskubide-esparru horiek izan desgaitasun fisikoa duten emakumeok indarkeria anitzei aurre egiten jarraitzen dugu, eta indarkeria horiek larriagotu egiten dira ingurune digitaletan, hala nola online kontrola eta zaintza, ziberjazarpena, nortasunaren ordezkapena edo informazioa baimenik gabe zabaltzea, eta baita salatzea eta babestea zailtzen duten oztopo teknologikoak ere.
Indarkeria horiek indartu egiten dira eskuragarritasun faltagatik, eten digitalagatik, infantilizazioagatik, gehiegizko babesagatik eta gure autonomia zalantzan jartzen duten estereotipoengatik. Informaziorako sarbidea mugatua denean, salatzeko tresnak eskuragarriak ez direnean, gizarteak gure sinesgarritasuna zalantzan jartzen duenean, indarkeria digitalak eremu emankorra aurkitzen du isilik egoteko.
Horregatik, ALDARRIKATZEN DUGU:
• Ingurune digital segurua, irisgarria eta indarkeriarik gabea izateko eskubidea, desgaitasun fisikoa duten emakume eta neska guztientzat.
• Bizitza digitalean autonomiaz parte hartzeko eskubidea, gure intimitatea, irudia eta erabakiak kontrolatuak eta manipulatuak izan gabe kudeatuz.
• Indarkeria digitala prebenitzeko, antzemateko eta horren aurrean jarduteko politika, baliabide eta zerbitzu eskuragarriak garatzea.
• Genero-ikuspegia sartzea desgaitasun-politiketan, eta desgaitasuna sartzea berdintasun- eta segurtasun-politika digitaletan.
• Salaketa, laguntza juridiko, psikologiko eta sozialeko prozesuetan irisgarritasuna bermatzeko neurriak. • Gaitasun digital seguruei buruzko prestakuntza, desgaitasuna duten emakumeentzat eta familientzat, profesionalentzat eta zaintzaileentzat eskuragarri dagoena.
• Erakunde, administrazio eta enpresa teknologikoen konpromisoa, gure eskubideak babesteko, segurtasuna hobetzeko eta irisgarritasun unibertsala ziurtatzeko.
Horregatik guztiagatik, dei egiten diegu Estatuari, erakundeei, sektore teknologikoari eta gizarteari, oro har, desgaitasun fisikoa duten emakumeen eta neskatoen aurkako indarkeria digitala aitortu, prebenitu eta desagerrarazteko. Segurtasun digitala eskubide bat da, guztioi dagokigu, eta salbuespenik gabe bermatu behar da.
Izan ere, desgaitasun fisikoa duten emakume eta neskatoek eskubidea dugu, mundu fisikoan zein digitalean, indarkeriarik gabe bizitzeko!